Краіны Персідскага заліва ўсё больш уцягваюцца ў вайну супраць Ірана праз няспынныя атакі, якія падрываюць іх эканоміку. Саудаўская Аравія і ААЭ блізкія да таго, каб далучыцца да ўдараў ЗША па Іране. Пра гэта піша The Wall Street Journal.
Як паведамілі выданню крыніцы, знаёмыя з сітуацыяй, Саудаўская Аравія нядаўна дазволіла амерыканцам выкарыстаць сваю авіябазу імя караля Фахда на заходнім баку Аравійскага паўвострава. Перад пачаткам баявых дзеянняў каралеўства заяўляла, што не дазволіць выкарыстоўваць свае аб’екты або паветраную прастору для атак на Іран. Спроба застацца ўбаку ад вайны правалілася, калі Іран пачаў абстрэльваць ракетамі і беспілотнікамі важныя энергетычныя аб’екты Саудаўскай Аравіі і сталіцу Эр-Рыяд.
Наследны прынц Мухамед бін Салман блізкі да рашэння далучыцца да ўдараў ЗША па Іране. Адна з крыніц WSJ заявіла, што ўступленне каралеўства ў вайну — толькі пытанне часу.
«Цярпенне Саудаўскай Аравіі што да іранскіх нападаў не бязмежнае, — заявіў міністр замежных справаў Саудаўскай Аравіі Фейсал бін Фархан журналістам на мінулым тыдні пасля серыі іранскіх атак на энергетычную інфраструктуру Персідскага заліва. — Любое перакананне ў тым, што краіны Персідскага заліва не здольныя адказаць, памылковае».
Тым часам ААЭ, якія многія гады былі фінансавым цэнтрам для іранскіх прадпрыемстваў і прыватных асоб, папярэдзілі пра магчымасць замарожвання іранскіх актываў на мільярды даляраў.
«Некаторыя ўстановы, наўпрост звязаныя з іранскім рэжымам і Корпусам вартавых ісламскай рэвалюцыі, будуць закрытыя ў рамках мэтаскіраваных мер пасля таго, як будзе высветлена, што яны выкарыстоўваліся не па прызначэнні для прасоўвання інтарэсаў іранскага народа і ў парушэнне заканадаўства ААЭ», — заявіў урад, маючы на ўвазе Корпус вартавых ісламскай рэвалюцыі.
Пры гэтым у Эміратах абмяркоўваюць пытанне пра тое, каб адправіць свае войскі на фронт, і адгаворваюць ЗША ад спынення агню раней, чым вайсковы патэнцыял Ірана будзе знішчаны.
Дзеянні ААЭ і Саудаўскай Аравіі паказваюць, як арабскія манархіі ўсё глыбей уцягваюцца ў супрацьстаянне паміж ЗША, Ізраілем і Іранам, адзначае WSJ.
