Аўкцыён па продажы карцін з калекцыі Віктара Бабарыкі, арганізаваны на пляцоўцы «БелЮрЗабяспечання», не адбыўся. На астатнія пяць выстаўленых работ пакупнікоў не знайшлося.
Гаворка пра лоты, якія раней таксама не змаглі прадаць і паўторна выставілі на таргі з прыкметна зніжанай стартавай цаной. Аднак нават істотны дысконт — у асобных выпадках больш чым у два разы — не зацікавіў удзельнікаў.
Паводле звестак пляцоўкі, таргі па шэрагу пазіцый прызнаныя несапраўднымі праз адсутнасць заявак.
Напрыклад, самы дарагі лот з выстаўленых на аўкцыён у сакавіку — твор «Арлекін» французска-польскага мастака Яўгена Зака — першапачаткова выстаўлялі ад 99 312 рублёў. А да сакавіцкага аўкцыёну стартавая цана апусцілася да 39 724,8 рубля.
«Букет кветак» пэндзля гэтага ж аўтара першапачаткова спрабавалі прадаць па цане ад 66 208 рублёў. А пазней яе знізілі да 26 483,2 рубля.
«Пейзаж» Міхаіла Кікоіна быў выстаўлены за 56 277 рублёў. Ягоныя ж «Яблыні» — за 49 656 рублёў. У сакавіку першую карціну прадавалі па цане ад 22 510,8 рубля, а другую — ад 19 862,4 рубля.
У інтэрв'ю YouTube-праекту «ТОК» Віктар Бабарыка расказаў, што з усіх карцін яго асабістай калекцыі самай каштоўнай для сябе ён лічыў каляровую літаграфію Марка Шагала «Лесвіца Якава»:
— Мне проста сам сюжэт вельмі падабаецца — і яна ў мяне вісела ў спальні. Яе мне, відаць, больш за ўсё шкада… што яе забралі і прадалі, — прызнаўся прэтэндэнт у кандыдаты ў прэзідэнты 2020 года.
Варта адзначыць, што Шагал некалькі разоў звяртаўся да сюжэту «Лесвіца Якава», малюючы яго рознымі метадамі і матэрыяламі. Імаверна, у калекцыі экс-банкіра магла быць літаграфія 1977 года.
Між тым сярод выстаўленых на аўкцыён на пляцоўцы «БелЮрЗабяспечання» твораў мастацтва з калекцыі экс-банкіра не было «Лесвіцы Якава» ці любой іншай працы Шагала. Які лёс арыштаванай карціны, невядома.
Пераслед Віктара Бабарыкі
Экс-старшыня праўлення «Белгазпрамбанка» Віктар Бабарыка 12 траўня 2020 года заявіў пра свае прэзідэнцкія амбіцыі. На момант рэгістрацыі кандыдатаў Бабарыка быў ужо затрыманы. У рэгістрацыі яму адмовілі на падставе інфармацыі з ліста КДК.
6 ліпеня 2021 года Вярхоўны суд вынес прысуд. Віктар Бабарыка атрымаў 14 гадоў калоніі ўзмоцненага рэжыму. Суд прызнаў яго вінаватым у атрыманні хабару ў асабліва буйным памеры арганізаванай групай, а таксама ў здзяйсненні фінансавых аперацый са сродкамі, атрыманымі загадзя злачынным шляхам. Віктар Бабарыка на судзе сваёй віны не прызнаў.
Увечары 26 красавіка 2023 года з’явілася інфармацыя пра тое, што Віктар Бабарыка, зняволены ПК-1 Наваполацка, у ноч на 25 красавіка быў шпіталізаваны ў гарадскую бальніцу — нібыта са слядамі збіцця і пнеўматораксу. Раніцай 27 красавіка блізкім палітыка ўдалося пацвердзіць факт яго шпіталізацыі ў хірургічнае аддзяленне. Дзяржорганы каментаваць сітуацыю адмовіліся.
27 красавіка 2023 года штаб Віктара Бабарыкі паведаміў, што экс-банкір заставаўся ў бальніцы, яго не збіраліся некуды перавозіць, бо транспартаванне было жыццёва небяспечным. Аднак у наступныя дні пра дакладнае месцазнаходжанне Бабарыкі ў ягонай камандзе не ведалі, убачыць яго не ўдалося. 29 красавіка прадстаўнік адміністрацыі папраўчай калоніі заявіў, што зняволены Бабарыка «жывы і здаровы» і працягвае адбываць сваё пакаранне. Аднак ніякіх пацверджанняў гэтым словам у сілавых структурах не прывялі. 2 траўня таго ж года сваякі Віктара Бабарыкі спрабавалі трапіць на прыём да кіраўніцтва Дэпартамента выканання пакаранняў (ДВП) МУС. Але ім адмовілі ў прыёме.
З таго часу інфармацыі пра Бабарыку з’яўлялася вельмі мала, урыўкавыя звесткі паведамлялі экс-палітвязні, якія выходзілі на волю з калоніі.
Раней праз аўкцыёны прадалі іншую маёмасць Віктара Бабарыкі, уключаючы аўтамабіль і гадзіннікі.
Зямельны ўчастак экс-банкіра — самы дарагі актыў, адабраны ў палітвязняў і выстаўлены на продаж. Калі браць апанентаў Лукашэнкі агулам, то даражэй прадалі толькі кватэру Валерыя Цапкалы — амаль за 400 тыс. рублёў.
13 снежня Віктара Бабарыку разам яшчэ са 108 беларусамі вызвалілі і вывезлі ва Украіну.
Са снежня 2025-га жыве ў Берліне.
Чытайце таксама
